Kum 2025-ah airport 220-ah tihpun hman tum

Civil aviation minister Jyotiraditya Scindia chuan hri leng avanga hun eng emaw chen aviation sector lam hrekbeh a nih hnuah tuai thar chhoh a beisei thu sawiin, ram chhunga airport 140 awm mek chu kum 2025-ah 220-ah sorkarin tihpun a tum tih Lok Sabha-ah a sawi.

Minister Scindia chuan boruak a pangngai chho mek a, thlawhtheihna service pawh a pangngai chhoin, zin veivek pawh a pung leh tawh hle tih a sawi. Ni sarih liam ta chhung khan nitin thlawhtheihna hmanga khualzin veivak chu nuai 3.82 an tling a ni, a ti.

Kum 2014 thleng khan rampumah airport 74 a awm a, kum sarih chhungin airport thar 66 a awm hman a ni tiin, BJP kaihhruai sorkar laipui chuan kum sarih chhungin airport awm zat chu a let deuthawhin a tipung hman a, kum 2025-ah chuan 220-ah tihpun tum a ni, tiin a sawi.

Directorate General of Civil Aviation (DGCA) data in a tarlan danin, kum 2021 khan ram chhunga thlawhtheihna hmanga zin veivak mi vaibelchhe 8.38 an awm. Covid hri a leng ṭan tirh leh lockdown te kalpui a nih kum, kum 2020-ah chuan khualzin hi vaibelchhe 6.3 an awm thung.

Scindia chuan sorkarin cargo terminal thar 33 siam a tum thu sawi bawkin, pilot nih tumte tan flight training school 15 siam a tum tih a sawi. Pilot license pek theih dan pawh khirhkhan lutuk lo kalpui dan ngaihtuah a ni dawn tih sawiin, India rama pilot zinga 15% chuang chu hmeichhia an nih thu a sawi bawk.