Sri Lanka Navy-te'n India mi sangha mantu 16 man

Sri Lanka Navy-te chuan Tamil Nadu-a Rameswaram leh Mandapam-ah India mi sangha mantu 16 an man.

Q branch police-te sawi dan chuan heng sangha mantute bakah hian lawng pahnih an man tel a ni. Thla hmasa, February 12 pawh khan Sri Lanka Navy-te hian Palk Bay-a ramri kan a sangha an man avangin Rameswaram mi sangha mantu 12 an lo man tawh bawk.

Ministry of External Affairs minister of state V Muraleedharan chuan February 4 khan Lok Sabha-a ziaka zawhna chhangin Sri Lanka thuneitute hian vawi eng emaw zat International Maritime Boundary Line (IMBL) pela Sri Lanka tuipuia sangha an man nia puhin India mi sangha mantute hi an lo man tawh tih a sawi a, kum 2020 khan mi 74 manin kum 2021-ah phei chuan 159 lai an man niin a tarlang.