India-China Foreign Minister-ten meeting nei

Foreign minister S Jaishankar leh China foreign minister Wang Yi-te chuan nimin k hen Delhi-ah meeting an nei a, hei hi kum 2020-a ram pahnihten ramria buaina an neih hnua top official-ten meeting an neih dun lehna hmasa ber a ni.

Wang Yi hian Pakistan leh Afghanistan a tlawh hnuah, puangzar lawk loin Ningani zan khan Delhi a rawn thleng a, nimin tlai khan Nepal lam a pan leh nghal.

Delhi a rawn thlen hnuah Wang hian national security adviser Ajit Doval a hmu hmasa a, ramri buaina chungchangte sawidunin, indo thlen mekna Ukraine dinhmunte pawh an sawidun bawk. Wang hian Doval chu an rama zin turin a sawm bawk.

Hemi hnuah foreign minister Jaishankar nen Hyderabad House-ah meeting nei lehin, ramri buaina an neih mekte a rang thei anga chinfel a ṭul thute an sawidun a ni.

India leh China hian Ladakh khawchhak lama ramri-a ram pahnih sipaite intihbuai a thlen hnuah buaina chinfel dan ngaihtuahin high-level military talk an nei nghal a, sipai hotu leh ram palaiten inbiakna an neih hnuah an buaina hmun aṭang hian sipaite pawh an hnukkir ve ve a ni. High-level military talk hi March 11 khan a ṭum 15-na an nei leh a, mahse inremna mumal tak erawh an la siam thei chuang lo a ni.