Punjab CM-in financial package Rs vbc nuai 1 pe turin ngen

Punjab chief minister thar, Bhagwant Mann chuan CM office a luah hnua prime minister Narendra Modi hnena meeting an neihna hmasa berah, an state tan special financial package Rs vaibelchhe nuai khat pe turin a ngen.

CM Mann chuan state intodelh-a Punjab siam an tumna kawnga puihna turin kum hnih atan he special package pe tur hian PM hi a ngen a ni.

Meeting-ah Mann chuan an state sum dinhmun ṭhat tawk loh dante chu sawiin, sorkar hmasa lamte leiba hnutchhiah chu Rs vbc nuai thum a tling tawh tih a hrilh. Hei vang hian an state sum dinhmun siamṭha a, intodelh tura an hmalakna tura puihna an dil chu PM chuan Finance Minister a sawipui ngei a beisei thu a sawi bawk.

Punjab CM hian wheat leina tur, Rural Development Fund (RDF) leh Cash Credit Limit (CCL) tihkhawtlai mekte pechhuak turin a ngen bawk a, state sorkar chuan sorkar laipui aṭangin RDF a pek tur Rs vbc 1,082 a la nghak mek a ni, a ti.