Petrol leh diesel man ni 4 chhungin ṭum 3 tihsan a ni

India ramah ni li chhunga a vawi thumna atan nimin khan petrol leh diesel man tihsan a ni leh.

Nimin khan petrol leh diesel hi litre khatah pawisa 80-ah tihsan belh leh a ni a, March 22 aṭanga ṭum thum a man a tihsan tawh aṭangin fuel man punna hi Rs 2.40 a tling tawh.

Ni 137 chhung fuel man tihdanglam loha a awm hnuin, March 22 khan litre khatah pawisa 80-in tihsan a ni a, a tuk March 23-ah litre khat pawisa 80 bawkin tihpun leh a ni. March 24-ah thawm an neih loh hnuin, nimin March 25 khan pawisa 80 bawk hian a tihsan belh bawk.

Nikum November 4 aṭang khan fuel man hi tidanglam loin a awm reng a, hei hi state pangaa assembly inthlan neih dawn vang a nih thu leh, inthlan result puan felah a man hi tihsan a ni dawn niin eptu lam chuan an sawi a ni. BJP sorkar chuan inthlan neih tur inkaihhnawihna a nei lo niin sawi mah se, khawvel huapa crude oil man a san chhoh vak lai pawhin India ramah oil man hi tihdanglam a ni ve lo. Mahse eptuten an lo sawi lawk angin, state panga inthlan result puan fel a nih hnuah fuel man hi ennawn a ni chho nghal a, ni li chhungin ṭum thum a man tihsan a ni hman ta a ni.