Hri lengin ziaawm lam pan zel

India ramah Covid-19 hri lengin ziaawm lam a pan zel a, hri kai thar hmuhchhuah pawh an tlahniam zel.

Ningani khan ram pumah hri kai hmuh chhuah mi 1,685 an awm a, hemi ni vek khan hri vanga thi mi 83 an awm bawk.

Hri len ṭantirh aṭanga nimin zing dar 8 thleng khan ram pumah Covid-19 kai hmuh chhuah mi 4,30,16,372 an awm tawh a, an zinga mi 4,24,78,087 chu an dam leh tawh a ni. Hri kai mek, active case pawh a tlahniam sawt hle a, mi 21,530 awm mekin hei hi hri kai tawh aṭangin 0.05% a ni. Hri kai enkawl dam, recovery rate pawh 98.75% a ni mek.

Ni khata hri kai hmuh chhuah, daily positivity rate chu 0.24% niin, weekly positivity rate pawh 0.33% a ni tawh tih union health ministry chuan a tarlang.

India ramah Covid-19 hri a len hnuah hri kai hi kum 2020, August 7 khan nuai 20 an tling a, hemi kum vek August 23-ah nuai 30, September 5-ah nuai 40, September 16-ah nuai 50, September 28-ah nuai 60, October 11-ah nuai 70, October 29-ah nuai 80, November 20-ah nuai 90 leh December 19, 2020-ah vaibelchhe khat an tling. Kum 2021, May 4-ah hri kai hi vaibelchhe hnih tling chhoin, June 23-ah vaibelchhe thumah an kai chho hman a ni.

Covid-19 hri vanga thi mi 5,16,755 zinga mi 1,43,772 hi Maharashtra state ami niin, Kerala-ah mi 67,550, Karnataka-ah mi 40,044, Tamil Nadu-ah mi 38,025, Delhi-ah 26,149, Uttar Pradesh-ah 23,492 leh West Bengal-ah mi 21,197 in an thihpui tawh bawk.

Covid vaccine hi nimin zing thleng khan ram pumah dose 1,82,55,75,126 pek chhuah a ni tawh. Delhi khawpuiah Covid-19 vaccine la thei chinte chuan vaccine dose khatna an la kim a, 90% in a dose hnihna an la tawh bawk niin nimin khan deputy chief minister Manish Sisodia chuan Legislative Assembly inkhawmah a sawi.