Maoist helpawl hotu Ganapathy a bang

Kum 2004-a bul an ṭan aṭanga Communist Party of India (Maoist) helpawl hotu nihna chelhtu, Muppala Laxmana Roa, Ganapathy tia hriat lar chu a kum upat tawh vang leh hriselna ṭha tawk loh vangin a bang a, amah thlaktu atan hian Nambala Keshav Roa, Basavaraj tia hriat chu ruat nghal a nih thu helpawl thuchhuah chuan a tarlang.

Moaist central committee thupuangtu, Abhay chuan thuchhuah hi siamin, Ganapathy chu a hriselna a ṭhat tawh loh vangin CPI(M) general secretary anihna aṭangin a bang a, a banna hi central committee meeting chuan a pawmsak a, amah thlaktu atan hian Basavaraj chu thlan a ni nghal bawk a ni, a ti.

Ganapathu hi kum 71 mi a ni tawh a, amah thlaktu atana thlan Basavaraj hi kum 63 a ni. Ganapathu hian a lu manah cheng vaibelchhe 2.5 a nei mek a ni.

Zirtirtu hlui, Ganapathy hian kum 1970 chho khan Maoist movement hi a zawm a, kum 1992 khan Andhra-based CPI(Marxist-Leninist) (People’s War) tihah hotu a ni. Kum 1998-a an pawl leh Bihar-a CPI(Marxist-Leninist) (Party-Unity) te an inchhunfin thlengin he dinhmun hi a chelh a, kum 2004 khan CPI(ML)(PW) inzawmkhawm leh Bihar-a Maoist Communist Centre of India (MCCI) chu inchhunfin lehin, CPI (Maoist) tih an ni ta a ni.

Maoist helpawl hotu thar Basavaraj hi Maoist Central Military Commission (CMC) hotu nilai a ni a, intelligence te chuan he dinhmun a chelh hnuah hian helhoin Bastar-a security force an beihna thleng ṭhin pawh a hluar phah niin an sawi. Explosive leh military tactis lamah expert nia sawi a ni a, kum 28 chhung a underground tawh a ni. Warangal-a Regional Engineering College (REC) aṭanga graduate a ni a, zirlai a nih lai pawhin nawrh huaihawt vangin man a lo tawk fo tawh a ni.