Bihar shelter home chung-chang CBI chhui tir dawn

Supreme Court chuan nimina Bihar-a thil dik tawk lo thlenna shelter home leh a neitute chungchang chu chhui chiang turin Central Bureau of Investigation (CBI) a hriattir.

Court chuan Bihar sorkar hnenah pawh CBI team chu theihtawpa lo thawhpui a, an mamawh angte lo pe zel turin a ti bawk. Hei bakah hian TISS in an social audit report-a an thil tarlante chu CBI in a chhui dawn tih a sawi bawk.

Bihar-ah hian chhui chian ngai shelter home hi 17 awmin, heng zinga Muzaffarpur shelter home case chu CBI hian a chhui mek a ni. Muzaffarpur shelter home-ah hian hmeichhe naupang enkawl lai te chu pawngsual nia sawi a ni a, CBI chuan December 7 hian chargesheet thehluh a tum tih court a hrilh tawh bawk.

Hetihlai hian Bihar sorkar chuan CBI chhuitir hi a duh lo thung a, SC hnenah hun pe leh tura ngenin, thil sual titute chu a man ngei tur thu a sawi. Status report pe turin ni 10 hun pe turin a ngen a ni.

Chief Justice of India Rajan Gogoi-a kaihhruai Supreme Court bench chuan Muzaffarpur shelter home-a thil thleng chungchang a chhuinaah Bihar sorkar chu a nem lutuk nia sawiin a lo khak tawh a ni.