Delhi sorkarin draft "Electric Vehicle Policy 2018" tlangzarh

Delhi sorkar chuan khawpui chhunga motor registration thar zinga 25% te kum 2023-a electric vehicle, e-vehicle leh an nih theihna tura ruahmanna a siam, draft "Electric Vehicle Policy 2018" chu Thawhlehni khan a tlangzarh.

Delhi Transport Minister Kailash Ghalot chuan an policy chungchang sawifiahin, "Thlasik laia khawpui chhung boruak tibawlhhlawhtu zinga 30% chu motor khu hi a ni. Hei vang hian meikhu tichhuak lo, electric vehicle hman dan ngaituah vat hi Delhi tana thil ṭul leh pawimawh a ni", a ti.

Khawpui boruak bawlhhlawh belh zel avangin Delh sorkar pawhin kawng hrang hrangin ruahmanna a lo siam tawh a, an hmalakna kawng khat atan electric vehicle hman hi an telh a ni.

Transport Department chuan Electric Vehicle Policy 2018 hmang hian Delhi khawpui chhunga km 3 danah 'battery charging leh swapping' tih theihna turin infrastructure pawh thuam ṭhat tum a ni tih a sawi. Non-electric vehicle aṭanga additional fee lakte chu electric vehicle hmanna tur atan hian hman a ni dawn tih a sawi bawk.

He policy hnuaiah hian Delhi sorkar chuan e-two wheeler leitute chu subsidy Rs 22,000 thleng pek a rawt a, hei bakah hian electric vehicle-ah chuan tax leh fee (road tax, registration fees and one-time parking fee at MCD) ngaihdam vek an ni bawk ang.

Electric auto-rickshaw leh e-rickshaw neitute chu sorkarin subsidy Rs 12,500 - Rs 20,000 thleng a pe dawn a, heng electric rickshaw leh e-cab hmangtu passenger-te pawhin cashback Rs 10 zel an la thei dawn bawk a ni.