Pakistan-in Saarc summit-ah PM Modi sawm a tum

Pakistan sorkar chuan South Asian Association for Regional Cooperation (Saarc) summit neih turah Prime Minister Narendra Modi chu tel tura sawm a tum tih a sawi.

Islamabad-a thu a sawiah, Pakistan foreign office thupuangtu Moham-mad Faisal chuan he thu hi a sawichhuak a ni. Saarc summit hi kum 2016 khan Pakistan khawpui, Islamabad-a neih tura tih a ni a, mahse Pakistan firfiakten Jammu and Kashmir-a Uri an beih avangin India chu summit neih turah hian a inhnukdawk a ni. Hemi hnu hian member ram pariat awmna, Saarc-a tel, Afghanistan, Bhutan leh Bangladesh pawhin summit neih tur aṭang hian an inhnuhdawk zui ve leh a, hei vang hian summit neih tur hi ṭhulh a ni ta a ni. Hemi hnu hian summit hi buatsaih chhunzawm a la ni leh lo.

Hetihlai hian hian India foreign ministry official chuan summit neih tur hun tur tak hi tihchian a la ni lo a, official-a sawmna pawh an la dawng lo tih a sawi. Saarc summit hi a tlangpuiin November thlaah neih a ni ṭhin a, kuminah chuan November thlaah neih hman a ni tawh dawn lo a, hei bakah hian member zinga mi Bangladesh pawhin December thlaah inthlanpui a nei dawn a, nakkumah India-in inthlanpui a nei leh dawn bawk a ni.

External Affairs Minis-ter Sushma Swaraj-i chuan official-a sawmna la hmu lo mah se, Pakistan-in firfiakte a dodalna a lantir hma chuan Pakistan chu inbiakna an neihpui dawn lo tih a sawi a, Saarc summit-ah India pawh a tel dawn lo a ni, a ti.