PM Modi-a'n Mann Ki Baat vawi 87-na hmang

Prime minister Narendra Modi chuan thla tina radio programme a hman ṭhin, Maan Ki Baat vawi 87-na chu nimin khan a hmang leh.

PM Modi chuan a thusawi ngaithlatu ram mipuite hnenah tui renchem turin a chah. Tui hman nawn theih dante ngaihtuah a, in lama tui hmante pawh pangpar leh thlai tui pekna atana hman nawn dan ngaihtuah turin a ti a ni. Naupangte pawh tui humhalhna kawnga hma hruaitu ni turin a chah bawk. Ram chhunga tui humhalhna kawnga theihtawp chhuahtute hmalakna dante pawh a sawilang a ni.

Modi chuan India-in thil thawnchhuah tura a target, USD tluklehdingawn 400 a tlin theih avangin India mipuite a lawmpui thu a sawi bawk a, hei hian India theihna neihte a tilang a ni, a ti. Khawvel ram dangah India thil siamte lar chhoin, duhtu an pung zel tih a lang a ni, tiin a sawi.

India-in ram danga a thil siam a thawnchhuah hi April-March, 2020-21 khan USD tld 292 a nih laiin, April-March 22, 2021-22-ah khan USD tld 400 a tling chho a, a punna hi 37% zet a tling pha. Chawhrualin darkar khatan USD mtd 46 hu bungrua thawnchhuah ziah ang a ni.

Government e-Marketplace (GeM) avangin ram chhunga sumdawng tenauten hlawhtlinna an hmu chho zel tih PM chuan a sawi a, tun hmaa sumdawng lian chauhin sorkarah an thil siamte an hralh thei nia ngaih a nih laiin, sumdawng tenau zawkte pawhin an ti thei tawh a ni, a ti. Kum khat liam ta chhung khan GeM portal kaltlangin sorkar chuan sumdawng tenaute bungrua hi cheng vaibelchhe nuai khat chuang a leisak tih a sawi bawk. Sorkara an thil siamte hralhtu hi sumdawng tenau zawk nuai 1.25 dawn an tling tih a tarlang.

Maan Ki Baat programme hi Prime Minister hian thla tina Pathianni hnuhnung ber, chawhma dar 11-ah a hmang ṭhin. Episode hmasa ber hi kum 2014, October 3 thla khan a nei a ni.