Trade union-in Bharat Bandh huaihawt dawn ; Banking leh Transport sector a nghawng dawn

Trade union chuan sorkar laipui economic policy duh lohna lantirin vawiin aṭangin ram pum huapin bandh an huaihawt dawn.

Bharat Bandh hi vawiin leh naktuk hian an huaihawt dawn a, mahse lungawi lohna lantirnaah hian BJP leh TMC hnuaia trade union-te erawh an tel ve dawn lo.

Nawrh huaihawt hian banking sector a nghawng tel dawn a, All India Bank Employees Association chuan bank hnathawkten nawrh hi an zawm dawn tih a sawi. Insurance sector hnuaia hnathawkte pawhin an zawm ve dawn bawk. State Bank of India chuan nawrh huaihawt vang hian banking service lam pawh a bahhlah phah maithei tih an sawi lawk a, hemi rual hian dan pangngai anga hna an thawh theihna turin theihtawp erawh an chhuah tih an sawi.

Roadways, transport worker leh electricity worker-te pawhin bandh hi an thlawp dawn a, anni bakah coal, steel, oil, telecom, postal, income tax, leh copper sector hnuaia hnathawkte pawhin he bandh hi an zawm dawn a ni.