Delhi-ah loneituten kawng zawh

Sorkar laipuiin an harsatna tawhte a ngaihsak loh avanga lungawi loin, nimin khan Delhi-a loneituten kawng an zawh a, kawngzawhnaah hian mi nuai khat dawn an tel.

Loneitute hian hmun hrang hrang aṭangin Delhi hi an pankhawm a, Anand Vihar rel station aṭanga thlengte chu Left-backed zirla pawl, AISA ten an lo dawngsawng a ni. Delhi chhimthlang lam, Bijwasan-ah pawh mi tam tak thlengin he hmun aṭang hian Ramlila Maidan panin kawng hi an zawh nghal a ni.

Kawngzawh vang hian Bijwasan leh Dwarka Link Road-ah traffic a buai phah hle. Loneitute chuan vawiin hian Ramlila Maida aṭangin Parliament panin kawngzawh hi chhunzawm an tum.

Loneitute pawl hrang hrang 208 inzawmkhawm, All India Kisan Sangharsh Coordination Committee (AIKSCC) convenor Hannan Mollah chuan Ramlila ground-ah hian lonetiute pual hian cultural programme, 'Ek Sham Kisan Ke Naam' buatsaih nghal a ni dawn tih a sawi. Vawiin-a Parliament pana kawng an zawh hunah, an hruaitute chuan loneitute harsatna tawh hrang hrangte an sawichhuak dawn a, BJP nilo political party dang hruaitute pawhin thu an sawi dawn a ni, a ti.

State hrang hrang, a bikin Maharashtra leh Madhya Pradesh-a loneituten an thlai thar hralhna man chhiat vang leh leiba an ngah avanga harsatna nasa tak an tawh chhoh avangin an harsatna sutkian dan tur ngaihtuah hian kum 2017, June thla khan AIKSCC hi din a ni. Private member bill pahnih - The Farmers Freedom from Indebtedness Bill 2018 leh Farmers' Right to Guaranteed Remunerative Minimum Support Price for Agricultural Commodities Bill 2018 an siam a, heng bill-te hi loneitute harsatna tawh dante uluk taka sawiho a nih hnuah buatsaih a nih thu Mollah chuan a sawi.

AIKSCC chuan leiba ngah avanga loneitute harsatna sutkian dan leh, an thlai tharte man sang zawka hralhchhuah an nih theih dan ngaihtuah leh sawiho tura Parliament special session koh an phut a, heihi neih anih ngei theih nana inrawlh turin President Ram Nath Kovind pawh an phut bawk.