Chidambaram-ah GDP data tihchhuah sawisel
Union Finance Minister hlui P Chidambaram-a chuan BJP kaihhruai NDA sorkarin Nilaini-a back series GDP data a tihchhuah chu sawiselin, Niti Aayog-in revised GDP number a tihchhuah chu fiamthu thawhna ang maia a ngaih thu a sawi.
Chidambaram chuan he data siam thar hian Market Price Linked Methodology anga global standard-a GDP chhut dan te leh langtlanga data siamna tura thuneitu sang, NSC (National Statistical Commission) chu a ngai pawimawh lo hle niin a sawi.
Congress party hruaitu chuan a twitter-ah hemi chungchang hi sawilangin, "Niti Aayog-in GDP number a ennawnna hi thil nuihzathlak tak a ni. Fiamthu ṭha lo tak a ni. Dik tak chuan fiamthu ṭha lo tak ai pawhin a la ṭha lo zawk. Niti Aayog hian hna awmze nei lo a thawk a, hei vang hian hetiang hlutna nei lo hi tihtawp a hun a ni", a ti.
NDA sorkarin GDP data a tihchhuah tharah hian Congress kaihhruai UPA sorkar laia GDP growth rate chu tihhniam a ni.
Chidambaram chuan GDP hmasate kha National Statistical Commission-in a chhut vek a nih thu sawiin, he Commission hi tihtawp a ni ta em ni tiin a zawt leh bawk. Niti Aayog chuan data chhut kawngah tihtur engmah a nei ve lo tih sawiin, hemi chungchangah hian Niti Aayog Vice Chairman Rajiv Kumar chuan debate neih a remti em tih a hriat duh thu a sawi.
Nilaini khan NDA sorkar hian back series GDP data thar tichhuakin, central-a UPA sorkar lai, kum 2006-2012 chhunga Gross Domestic Product growth rate chu siamṭhain a tihhniam sak a ni.
Kumin August thla khan e National Statistical Commission chuan back series GDP hi a tichhuak a, hetah hian NDA sorkar hnuaiah aiin UPA sorkar laia GDP growth rate a san zawk thu tarlan a ni. Congress kaihhruai UPA in thuneihna an chan lai hian India ram economy ṭhanna chu 10.3% a tlin phak kum pawh a awm nia tarlan a ni. Prime Minister Narendra Modi-a kaihhruai sorkar chuan hei hi official estimate a ni lo tia a sawi hnuah, Nilaini khan Niti Aayog chuan a hranin a tichhuak ve leh a, hetah hian UPA sorkar laia GDP growth rate, 2010-11 chhunga 10.3% nia NSC in a tarlan tawh chua 8.5% zawk nia sawi a ni.