Ni 7 chhungin petrol leh diesel man vawi 6 tipung ; Fuel man tihpun vangin Parliament inkhawmah inaubuai

Petrol leh diesel man chu nimin khan tihsan leh a ni a, hei hi India ramah ni sarih chhunga fuel man vawi ruk tihsanna a ni.

Petrol man hi litre khat pawisa 30 leh diesel litre khat pawisa 35-a tihsan a ni. Nimin khan Delhi-ah petrol litre khat man hi Rs 99.41 niin, diesel litre khat Rs 90.77-ah a kai tawh a ni. Mumbai-ah petrol litre khat Rs 114.19 leh diesel litre khat Rs 98.50 a tling a, metro city zingah Mumbai hi fuel man sanna ber a ni.

Khawvel huapa crude oil man a san hnuah pawh India ramah hian thla li chhung chu fuel man hi tihdanglam lohin a awm a, mahse March 22 khan sorkar chuan a man rawn tipungin, hemi hnu hian ni sarih chhungin vawi ruk zet a tipung hman tawh. Vawi ruk tihpun tawh aṭangin March 22 hnua petrol man sanna hi litre khatah Rs 4 leh diesel hi litre khatah Rs 4.10 a tling tawh.

Rajya Sabha rorel inkhawm titawp
Nimina Rajya Sabha inkhawmah eptute chuan fuel man tihsan leh trade union-ten ram pum huap nawrh an huaihawt mek chungchang sawiho phutin rorel inkhawm an aubuai a, hei vang hian chairman M Venkaiah Naidu chuan inkhawm a tihtawp phah a ni.

Chairman Naidu chuan eptuten thil sawiho phutna an thehluh chu a hmuh thu leh, a remti rih loh tih a sawi a, mahse eptu member-te hi lungawi loin sawiho phutin an aubuai zui a ni. Inkhawm hi tihtawp a nih bakah, Zero Hour pawh hman a ni lo bawk.

Upper House-ah hian kar liam ta khan fuel man sang chungchang avanga member-te inhnialbuaina thleng vangin ṭum eng emaw zat rorel inkhawm tihtawp a ni tawh bawk a ni.

Nimina Rajya Sabha chairman-in inkhawm a tihtawp hnu hian eptu MP-te chuan twitter lamah BJP sorkar chu an bei zui a, Trinamool Congrss MP Derek O'Brien chuan BJP chu thil pawimawh tak sawiho ngam loa tlanchhiaah a puh. Congress MP Jairam Ramesh pawhin Modi-a sorkar chuan thil sawiho a duh lo a ni, a ti bawk.

LS Speaker-in Zero Hour-ah sawiho a remti
Lok Sabha inkhawmah pawh eptuten fuel man sang chungchang sawiho an phut chu Speaker Om Birla chuan a remti lo a, Zero Hour-ah sawichhuahna hun a pek zawk tur thu a sawi.

Chawhma dar 11-a rorel inkhawm ṭan a nih veleh, Congress leader Adhir Ranjan Chowdhury, Trinamool Congress member Sudip Bandyopadhyay leh DMK hruaitu TR Baalu-te chuan kar khat chhunga vawi ruk zet fuel man tihsan anih chungchang chu House-a sawiho an phut a ni.

Eptu party member-te hi House laiah chhuak khawmin, fuel man tihsan an duh lohna thu leh, a man tihsanna chu sut tura Modi kaihhruai sorkar an phut thute an aupui zui bawk.

Mahse Speaker chuan first hour chu Question Hour atana dah a nih avangin, rorel inkhawm hi tihbuai a remti lo tih a sawi a, chawhnu lama Zero Hour neih hunah sawiho a remti dawn tih a sawi. Hemi hnu hian eptu member-te pawh an seat lamah an kir ve leh a ni.