Mamata Banerjee-i'n eptu hruaitute lehkha thawn

West Bengal chief minister, Trinamool Congress (TMC) hruaitu Mamata Banerjee chuan eptu party hruaitu leh non-BJP Chief Minister-te hnenah lehkha thawnin, BJP sorkar rorelna dik lo bei let tura thawkho turin a sawm.

TMC hruaitu hian India rama BJP inlulingna bei let tur hian pawl hrang hrangte an inlungrual a ṭul tih sawiin, BJP beih letna tura hma lak dan tur ngaihtuaha meeting neih a ṭul thute a sawi bawk.

Banerjee chuan BJP-in India ram inṭhuikhawmna lungphum chu BJP chuan an bei fo a, hei vang hian hetianga midangte awpbeh a tumna hi inlungruala beih let a hun tawh a ni, a ti.

Central agency - Enforcement Direc­torate, CBI, Central Vigilance Commission (CVC) leh Income Tax Department-te chu BJP sorkar chuan dik lo taka hmangin, politics lama khingpuite beih leh phuba lakna hmanrua atan a hmang a ni, tiin Banerjee chuan a sawi. "Rorellai BJP-in heng agency-te hmang a, eptu hruaitute neksawrna atana a hman tum ṭhin hi kan dodal a ngai a ni. Central agency-te hi inthlan a awm dawn hnaihah an che chhuak fo zel a ni," a ti. Rorelna langtlang leh innghahna tlak an duh laiin, BJP-in phuba lakna politics a kalpui ṭhin chu enliam mai tur a ni tawh lo tih a sawi.

Bengal CM chuan eptu hruaitute'n meeting an neih ah, India ramin a phu ang ngei sorkar ṭha a neih theihna tura kawng an buatsaih a ṭul tih sawiin, eptu party-te chuan sorkar dik lohnate hailan a, aw an chhuah chu an mawhphurhna a ni, a ti.