PM Modi-a'n PMAY-G hnuaia in nuai 5.21 sak a hawng

Prime minister Narendra Modi chuan nimin khan video conference kaltlangin, Madhya Pradesh-a Pradhan Mantri Awas Yojna (PMAY)-Gramin scheme hnuaia chenna in nuai 5.21 sak chu a hawng. PM hian heng insakte a neitu turte hnena hlanna, 'Grah Pravesham' (house-warming) neih pawh a telpui nghal a ni.

PM Modi chuan a kaihhruai sorkarin mi retheite tana chenna in pek chu a ngaih pawimawh ber zinga mi a ni tih a sawi. PM Awas Yojna scheme hnuaiah hian ram chhungah chenna in vaibelchhe 2.5 sak a ni tawh a, heng zinga vaibelchhe hnih chu rural area-ah sak a ni, a ti. Hei bakah Nal-Jal scheme hnuaiah chhungkaw vaibelchhe ruk hnenah an chenna in ngeiah tui connection pek an ni tawh tih a sawi bawk. Kum 2014-a sorkarna an chelh aṭangin, ration card dik lo vaibelchhe li chuang tihtawp a ni tawh a, mi retheite chanai lo ruksak tumte vengin theihtawp an chhuah tih a sawi.

Modi chuan ram mipuite chu India independence vawi 75 tlin lawmna pualin, thla 12 chhungin ram chhunga district tinah dil (lake) 75 zel siam turin a chah bawk.

Chattarpur-a in sak hawnna inkhawm buatsaihah hian Madhya Pradesh chief minister Shivraj Singh Chouhan pawh a tel.