Loneituten Parliament Street-ah kawng zawh

Ramchhung hmun hrang hrang aṭanga kalkhawm, loneitute chuan nimin khan a ni hnihna atan Delhi-ah kawng an zawh leh.

Loneitute hian an harsatna tawh hrang hrangte sorkarin a ngaihthah nia sawiin lungawi lohna kawngzawh hi an huaihawt a, nimin khan Parliament Street-ah kawng an zawh leh a ni. Loneitu pungkhawmte chuan tunlaia central-a thuneihna changtu, BJP-in a thil buaipui mek, Ayodhya chungchang chu an mamawh a ni ve lo a, anni chuan an harsatna sutkianna tura an loan ba ngaihdam sak chu an duh zawk tih an sawi.

Kawngzawhten an thil phut zingah hian an thlai tharte man ṭha zawka hralhchhuah a nih theihna turte, an loan ba ngaihdamte bakah Swaminathan report a taka hmante a tel. Nizamuddin, Sabzi Mandi Statio, Anand Vihar Terminal leh Bijwasan aṭangin Parliament pan hian kawng an zawh a ni.

Eptu party hrang hrangte chuan loneitute kawngzawh hian an thlawp thu an sawi a, anni bakah social activist-te pawhin an thlawp bawk. Social activist Medha Patkar leh journalist P Sainath-te chuan ramchhunga loneituten tun ang dinhmun harsatna hi an la tawk ngai lo tih an sawi.

Nimina kawngzawhnaah hmeichhia pawh eng emaw zat an tel a, Delhi University zirlai ṭhenkhat pawhin telpuiin loneitute harsatna tawk mekte chhawmdawlna tur pe turin sorkar laipui an phut tih an sawi a ni.

Kawngzawhnaah hian venhim hna thawk turin police 3,500 chuang dah an ni a, Ramlila maidan leh Parliament inkarah kawngzawh vanga mipui veivakten harsatna an tawh lohna turin traffic police 1,000 chuang zet dah ni ni bawk.