Sorkarin Kerala tan Rs vbch 2,500 pek remti

Sorkar laipui chuan thla tum liamtaa tuilianin chhiatna nasa tak a thlenna, Kerala state-a chhawmdawl hna thawhna atan cheng vaibelchhe 2,500 pek belh a remti.

Kerala state-a tuilian hi district 14 in tuarin, mi 483 an thi a ni. Tuilian tuarte chhawmdawlna tur hian sorkar laipui chuan cheng vaibelchhe 600 a lo pe tawh a ni.

Kerala Chief Minister Pinarayi Vijayan-a kaih-hruai sorkar chuan sorkar laipuiin ṭanpuina a pek hi a la tawk lo hle tih a sawi. State sorkarin tuilianin chhiatna a thlen hrang hrangte zirchiangin, sorkar laipui hnenah memorandum an thehlut tawh a, ṭanpuina cheng vaibelchhe 4,800 an dil a ni.

Sorkar laipuiin Rs vbch 2,500 a pek belh tur hi Ningania Union Home Secretary Rajiv Gauba kaihhruai committe chuan a pawm a, Home minister kaihhruai high-level committee hnenah an pawmpui turin an thawn leh dawn a ni. Hemi hnu hian Home Minister Rajnath Singh chuan finance minister Arun Jaitley leh agriculture minister Radha Mohan Singh te nen Kerala ṭanpuina pek belh tur hi an puang ang.

Kerala tuilian tuarte ṭanpuina tura UAE-in cheng vaibelchhe 700 pek a tum chu sorkar laipui chuan a hnarsak a, hei hian sawizui pawh a hlawh hle. Hemi hnu hian sorkar laipui chuan Kerala tan hian cheng vaibelchhe 600 a pe a ni.

Tuilianin state chhunga thil a tihchhiat hrang hrangte zirchianna hmasa neihah cheng vaibelchhe 20,000 hu a chhia nia chhut a ni. Mahse CM Vijayan chuan hei ai hian a tam zawk daih dawn niin a sawi a, an state-a chhiatna thleng chu kum za chhunga chhiatna thleng rapthlak ber niin a sawi.