Maha sorkarin Maratha tan quota 16% pek a remti

Maharashtra sorkar chuan zirna in leh sorkar hnaa Maratha hnam tana reservation 16% pekna tur bill chu a pawm.

Maratha hnam hi Maharashtra state mipui zinga 32% an tling a, socially and educationally backward-ah puan an ni. Hei vang hian an hnam puala zirna in leh sorkar hnaa an chanpual 16% dahna tur bill hi siamin, Ningani khan Chief Minister Devendra Fadnavis chuan state legislature-ah a pharh a, a pharh hnu reiloteah pawm nghal a ni.

State sorkarin Maratha hnam puala quota a siamsak leh tak avangin state chhung hnam bil tana reservation pek zat hi 68% a tling tawh dawn a ni. Ningania bill pass hi Maharashtra Governor C Vidyasagar Rao in a pawmpui hunah hman theih nghal a ni ang.

Sorkar hmasa, Conress-Nationalist Congress Party ṭangrual sorkar khan Maratha hnam tan hian 16% quota pek a lo remtihsak tawh bawk a, mahse hei hi court-in a hnawlsak a ni. Hemi hnuah hian sorkar thar, BJP sorkar chuan state backward class commission rawtna siam behchhanin, Maratha hnam tan quota hi a siamsak ve leh ta a ni.