Anna Hazare-an nawrh huaihawt lehah vau

Social activist Anna Hazare chuan eirukna dotu tur, Lokpal ruat a nih loh chuan nakkum January 30 aṭangin an khuaah tiam chin awm loa chaw nghei leh a tum tih a sawi.

Minister of State in Prime Minister's Office (PMO) Jitendra Singh Jitendra Singh hnena lehkha a thawnah, Hazare chuan BJP kaihhruai NDA sorkar chuan sorkar laipuia Lokpal leh state-a Lokayukta ruat chungchangah chhuanlam a siam zel niin a sawi.

Hazare chuan Prime Minister Narendra Modi-a kaihhruai sorkar chuan a tirah Lok Sabha-ah Leader of Opposition a awm loh vangin Lokpal ruat theih a nih lo tih a sawi a, mahse a hnuah selection committee-ah jurist an awm ṭha tawk lo niin chhuanlam dang a siam leh a ni, a ti.

Kumin March 23 khan Hazare hian Lokpal leh Lokayukta ruat phutin Delhi-a Ramlila Maidan-ah nawrh alo huaihawt tawh a, mahse PMO in ziak ngeia a thil phutte tihhlawhtlin a tiam hnuah a nawrh hi a titawp a ni a, October 2 thleng sorkar chuan a thutiam tihlawhtlin nan hian hun a pe ni.

"October 2 khan kan khua Ralegan Siddhi-ah nawrh huaihawt hi ṭan leh ka tum a, mahse Maharashtra chief minister leh minister dangten Lokpal leh Lokayukta ruatna tur chu tihfel a ni dawn hnai tih min tiam avangin hun pek belh leha, nakkum January 30 thleng nghah ka remti leh ta a ni", a ti. NDA sorkar chuan Lokpal leh Lokayukta ruat tumna tak tak a nei lo nia a ngaih thu a sawi bawk.