CJI hlui Misra hnuaiah SC kalphung a dik tawk lo : Justice Kurain Joseph

Supreme Court judge hlui Justice Kurain Joseph chuan Chief Justice of India (CJI) hlui Dipak Misra hnuaiah khan Supreme Court kalphung chu a dik lo niin a sawi.

Nikum December 30-a SC judge aṭanga chawl, Justice Joseph chuan Supreme Court kaldan dik lo thu hi an sawilang fo tih a sawi a, CJI hlui Dipak Misra hnenah pawh kalphung dik zawm tura an hrilh thute a sawi. Mahse engmah hmalakna a awmloh avangin court kaldan phung dik lo chu mipuite hnenah an hriattir a ngai ta a ni, a ti.

Kumin January 12 khan Supeme Court judge senior pali-te chuan press conference neih, CJI hlui Dipak Misra hnuaiah court kalphung fel lo leh dik lo chungchangte an sawichhuak a ni. Hei hi loh theihloha tih a ngai tih sawiin, Justice Kurain chuan hetiang hi Indian judiciary hnuaia a thlen vawi khatna a nih thu a sawi bawk.

Supreme Court judge dang pathum, Justice Jasti Chelameswar, Justice Ranjan Gogoi, leh Justice MB Lokur te nena court kalphung dik lo leh, hetihlaia CJI Misra thiltih dan dik tawk loh dante sawia kumin kumtira press conference an koh kha inchhirna a neih loh thu Justice Kurain chuan a sawi.