CEC tharin a hna thar chelh

Chief Election Commissioner of India thar, Sunil Arora chuan nimin khan a hna thar a chelh ṭan a, CEC 23-na a ni.

Sunil Arora hian kar kalta Inrinni-a chawl ta, Om Prakash Rawat a thlak a ni.

CEC thar hnuaiah hian nakkumah Lok Sabha inthlanpui neih a ni dawn a, hei bakah hian kum 2019 chhung hian Jammu and Kashmir, Odisha, Maharashtra, Haryana, Andhra Pradesh, Arunachal Pradesh leh Sikkim state assembly inthlan neih a ni dawn bawk.

Kum 62 mi Arora hian CEC hna hi kum ruk chhung emaw, kum 65 a tlin thleng emaw, a hmasa zawk zawk thleng a chelh ang. CEC atan hian election commissioner zinga a senior ber ruat chhoh zel an ni.

Kum 2017, August 31 khan Arora hi election commissioner atan ruat a ni tawh a ni. CEC atana a hming rawtna hi sorkar laipuiin a pawmpui hnenah President pawmpuina la turin Rashtrapati Bhavan-ah thawn a ni. President Ram Nath Kovind chuan a lo pawmpui a ni.

CEC thar Arora chuan charge a lak hnuah stakeholder hrang hrang - political party, media, civil society organisation leh mipuite chu thawhpuiah a sawm nghal a, inthlanna thianghlim, felfai leh rintlak siam a nih theihna atana thawhhonna ṭha tak an neih a duh thu a sawi.