Kejriwal chenna in kawtah BJP worker pungkhawm ; Inthlanah Arvind Kejriwal an hneh thei si loa, thah an duh ta a ni: AAP leader Manish Sisodia

BJP worker-te leh police-te chu nimin khan Delhi chief minister Arvind Kejriwal chenna in kawtah an innek buai a, hemi hnu hian senior Aam Aadmi Party (AAP) leader Manish Sisodia chuan BJP worker-te chu Arvind Kejriwal thah tumah a puh.

Arvind Kejriwal-a'n tunhnai lawkah film sawi hlawh tak 'The Kashmir Files' chungchanga a thusawi duh loin BJP worker-te hi an pungkhawm a ni.

Thlalak leh video aṭanga a lan dan chuan mi tam tak BJP flag leh placard kenga Chief Minister chenna in kawta police-te nena an innawr buai hmuh tur a awm a, security cordon zuan kan tum pawh eng emaw zat an awm. Police-te sawi dan chuan BJP Yuva Morcha mi 150-200 vel zet chuan nimin chawhma dar 11:30 velah khan CM chenna in an thleng a, Delhi assembly-a CM-in 'The Kashmir Files' chungchanga a thusawi duh lohna an lantir a ni, an ti. Pungkhawmte chu an hnawh sawn thu leh, an zinga mi 70 vel chu an hreng zui tih an sawi bawk.

Chawhnu dar 1 velah chuan duh lohna lantirtu eng emaw zat chuan daidanna an siamte chu tichhiain CM chenna in kawt an thleng leh a, an aurual bakah buaina an siam zui a ni. Rawng bur an kente chu CM in kawngahte an theh bawk niin Police thuchhuah siamah chuan an tarlang.

CM thusawi BJP-te'n an huat chu
Delhi Assembly-a Delhi BJP legislator-te'n 'The Kashmir Files' Delhi-a chhiah awl an phutna chu Delhi CM chuan chhang letin, "The Kashmir Files tax-free-in siam rawh u an ti a. YouTube-ah dah ula, a man tumahin an chawi dawn lo a ni mai alawm," tiin a sawi a, hei hian Delhi assembly member ṭhenkhat nuih a tizain dawhkante an chum hial a ni.

"Chhiah chawi loa tihchhuah engatinge in dil? In duh viau chuan Vivek Agnihotri hi YouTube-a dah turin ti ula, a thlawn a ni mai alawm. Mi zawng zawngin ni khat thil thuah an en vek thei dawn a, tax-free-a siam kher a ngai hlei nem," tiin a sawi zui bawk.

AAP lam thukhawchang
AAP leader Manish Sisodia chuan, "Vawiin hian BJP misualte chuan police awmlai rengin chief minister Arvind Kejriwal chenna in an thleng a ni. Inthlanah an hneh thei si lo a, chuvang chuan thah an duh ta a ni," a ti.

AAP leader ṭhenkhat chuan Delhi police-te chu BJP hruaitu leh worker-te chu pawikhawihna remchang siam sakah an puh a, deputy chief Minister Sisodia pawhin Twitter-ah Kejriwal-a ina CCTV camera leh security indaihdanna siamte chu tihchhiata a awm thu a sawi. Police-te chuan misualte chu CM inah an hruai ni hialin a sawi bawk.