BIMSTEC Summit-ah PM Modi a tel

Prime minister Narendra Modi chu nimin khan Bay of Bengal Initiative for Multi-Sectoral Technical and Economic Cooperation (BIMSTEC) summit vawi nga-naah a tel. Virtual hmanga summit neih hi BIMSTEC chair ni lai, Sri Lanka-in a thleng a ni.

PM Modi chuan thawhhona ṭha tak neih a ṭul thu leh, Bay of Bengal chu inzawmna ṭha tak neihna tur siam a hun tawh thu a sawi. "Tun hnaia Europe-a thil thlengte chuan regional cooperation ngaih pawimawh a ṭul zia a tichiang a ni," tiin BIMSTEC ramte chu kum 1997-a hlawhtlinna an lo hmuh tawh anga phur taka an hmathlir neihte tihhlawhtling tura thawk turin a sawm nghal bawk.

India chuan BIMSTEC secretariat chu operational budget tihpunna turin USD maktaduai khat a pe dawn tih Modi chuan a sawi a, "BIMSTEC secretariat thuam chak hi a pawimawh takzet a, hemi atana ruahmanna siam turin Secretary-General pawh ka ngen bawk a ni," a ti.

BIMSTEC hi regional mulilateral organisation niin, Bay of Bengal chhehvela ram pasarih - Bangladesh, Bhutan, India, Nepal, Sri Lanka, Myanmar leh Thailand-te chu member an ni. Bangkok Declaration kaltlangin kum 1997, June 6 khan he sub-regional organisation hi kalpui ṭan a ni.