Ni 10 chhunga a vawi 9-na atan fuel man tihsan a ni leh ; Fuel man tihsan duh loin LS aṭangin eptu member-te chhuak

India ramah ni 10 chhungin vawi 9 fuel man tihsan a ni tawh. Nimin khan petrol leh diesel man chu pawisa 80 ve vea tihsan a ni leh a, ni 10 chhunga fuel man sanna hi litre khatah Rs 6.40 a tling tawh a ni.

Delhi khawpuiah chuan nimin khan petrol litre khat rs 101.81 leh diesel litre khat Rs 93.07 a ni tawh. Metro city zingah fuel man sanna ber, Mumbai-ah petrol litre khat Rs 116.72 leh diesel litre khat Rs 100.94-ah a kai chho tawh bawk.

Nikum November 4 aṭang khan hun rei tak ram chhunga fuel man ennawn loha a awm hnuin, March 22 khan ennawn a ni a, hemi hnu hian vawi kua zet a man tihsan belh a ni tawh a ni.

LS aṭangin eptu member-te chhuak
Eptu member-te chu ram chhunga fuel man tihsan a nih chhunzawm zel avanga lungawi lohna lantirin, nimin khan Lok Sabha rorel inkhawmna aṭangin an chhuak.

House rorel inkhawm ṭan a nih veleh eptu MP-te chuan fuel man tihsan an duh loh thu an sawi chhuak nghal a, a man tihsanna chu sut leh nghal turin sorkar an phut bawk. Prime minister Narendra Modi kaihhruai sorkar chu anti-people policy kalpuiah puhin, an lungawi lohna thute an auchhuahpui a ni, thuziakte an keng tel bawk.

Speaker Om Birla chuan an ṭhutna lama kir tura a tih pawhin eptu member-te chuan zawm duh loin, lungawi lohna hi an lantir chhunzawm zel a ni. Minute 30 dawn an lungawi lohna thu an aupui hnuah House aṭangin an chhuak zui a ni. Eptu member chhuakte hi Congress leh Trinamool Congress, DMK, CPI, CPI-M leh TRS member-te an ni.

Congress-in Mehngai Mukt Bharat Abhiyan campaign nei
Congress party chuan fuel leh nitin khawsakna atana mamawh man tihsan chungchanga lungawi lohna lantirna, 'Mehngai Mukt Bharat Abhiyan' campaign chu nimin khan a nei ṭan a, thawh thumin kalpui tur niin April 7 thleng a awh ang.

Party president hlui Rahul Gandhi hoin nimin zing dar 9 khan party MP-te chuan Vijay Chowk-ah lungawi lohna an lantir a, sorkar chu thil man a tihsanna sut tura an phutna thuziakte an keng a ni. Thil man tihsan chu mipui nawlpui, mi harsa zawkte chu a tuartu ber an ni tiin, sorkar laipui chu miretheite sum laksak a, mi hausate kuta chhunglutah an puh.