AAP-in Kejriwal chenna in beih a nih chungchang HC-ah thlen

Aam Aadmi Party (AAP) leader Saurabh Bhardwaj chuan March 30-a Delhi chief minister Arvind Kejriwal chenna in beih leh suasam chungchang chu nimin khan Delhi High Court-ah a thlen a, he thil thleng hi chhui chian ngei a phut.

High Court-ah ngenna a thlenah, Bhardwaj chuan CM chenna in beih chungchang hi chhui chiang tura Special Investigation Team din tir turin a ti a, he pawikhawihna thlentute hi BJP worker-te nia sawi an nih thu leh, an thiltih hi Delhi police-te pawhin an hriatpui nia a lan thu a sawi bawk.

Nilaini chawhma lam khan BJP mi leh sa eng emaw zat chu The Kashmir Files chungchanga CM Kejriwal thusawi dana lungawi loin, CM official residence kawtah pungkhawmin an bei zui a ni. He thil thleng video hi hmuh tur pawh a tam a, pungkhawmte hian Delhi Police-te daidana siamte chu kaltlang luiin, CCTV camera-te an tichhia a, CM in luhna tur gate-ah rawng te thehin, ṭhenkhat chu gate-ah hian an lawn liam bawk. Hetianga pawi an khawih lai hian Delhi Police-te chuan an lo thlir ringawt a, lo dan tak tak an tum lo tiin Bhardwaj chuan a sawi.

AAP MLA Bhardwaj chuan an party chuan boruak ṭha tak hnuaia lungawi lohna lantirte chu an dodal ngai lo tih a sawi a, mahse tharum thawhna leh buaina chawh chhuahna hmanrua atana hman chu an remti lo tiin a sawi a ni. Tun ṭuma buaina hi Delhi CM leh a chhungte beihna a ni a, hei vang hian police-te chuan theihtawpa bengdaih an tum tur a ni, a ti.

Ram tan ka nunna ka hlan thei : Kejriwal
BJP mi leh sa nia sawiten a chenna in bula siam a, a in pawn lam an suasam chu Delhi chief minister Arvind Kejriwal chuan a dem thu sawiin, ram chhunga party lian berin hetianga pawikhawihna an thlen a nih chuan ramin hma a sawn thei lo ang, a ti.

CM Kejriwal chuan ram tan a nunna a hlan thei reng tih sawiin, "Arvind Kejriwal hi a pawimawh lo a, kan ram hi a pawimawh ber a ni. Hetianga suahsual bawlna hmang hian ramin hma a sawn dawn lo. India rama party lian ber, centre-a thuneihna chang mektu hian khawlaia suahsual bawlna a kalpui a nih chuan mipuite thinlungah thil dik lo tak a tuh thei dawn a, hetianga chetna hi tih dan dik zawk emaw an ti mai dawn a ni," tiin a sawi.