Loneitu lungawi loin a thlai hralhna man PM thawn

Maharashtra-a loneitu, Sajay Sathe chuan a purun tharchhuah chu kg 1 Rs 1 chuang hret chauha a hralhchhuah theih avangin lungawi lohna lantir nan a tharchhuah zawng zawng, kg 750 a hralhna chu Prime Minister Narendra Modi hnenah a thawn.

Nashid district-a Niphah tehsil-a cheng, Sanjay Sathe hi kum 2010-a hetihlaia US President Barack Obama'n India a rawn tlawh ṭuma Union agriculture ministry-in US President hmu tura 'loneitu hmasawn' a thlan chhuah zingah khan a lo tel tawh a ni.

PTI in a kawmnaah, Sathe chuan kumina purun hi kg 750 a tharchhuah thu a sawi a, mahse Niphad wholesale rate-ah kg khat Rs 1 chauh a ni a, inbiakna a neihpui hunah kg khat Rs 1.40-a pe turin an inrem thei hram a, purun kg 750 chu Rs 1,064-a a hralh thu a hrilh. Thla li chhung rim taka a hnathawhna, hlawkna awm miah loha a ral mai chu hrehawm a ti hle tih a sawi a, thlai thar man sang zawka hralhchhuah a nih theihna tur sorkarin an harsatna te a ngaihsak duh loh chu a lungawi lo tih a sawi a, a lungawi lohna lantir nan hian a purun hralhna chu PMO-ah Disaster Relief Fund atan a thawh a, money order-a a thawnna manah Rs 54 a la senbelh tih a sawi.

Sathe chuan eng political party hming maha ti a nih loh thu sawiin, sorkarin loneitute harsatna tawhte a hriatpui leh a ngaihthah avanga a lungawi loh thu a sawi a ni.