Dec 31 hnuah chip based ATM card chauh hman theih dawn

Reserve Bank of India chuan ramchhunga bank hrang hrangh hnenah an customer-te ATM card, magstripe based-te chu EMV (Europay, MasterCard and Visa) chip based card thar hmanga thlaksak vek turin a ti.

RBI hian kum 2015, August 27-ah circular a tihchhuahah, magstripe based ATM debit card-te chu kumin December 31 thleng tihnun a ni dawn a, hemi hnu lamah chuan a validity la tawp lo mah se hman zawm theih a ni dawn lo tih a tarlang a ni.

RBI thupek tihchhuah angin, ramchhunga bank lian ber State Bank of India (SBI) chuan an customer-te chu magstripe based ATM/debit card an la hman chuan December 31 hma ngeia EMV chip based card hmanga thlak vek turin a lo ngen tawh bawk.

EMV chip debit card-ah hian card hmalam veilamah chip dah a ni a, sim card chip nen a landan a inang a ni. Chip dah hi a digital transaction lamah a him zawkna tura ruahman a ni.

Bank-te chuan ATM card-te EMV chip-based hmanga thlak vek tura December 31 thleng hun pek chu pawtsei turin an lo ngen tawh a, mahse an ngenna hi central bank chuan a hnawlsak.