Fake news do nan WhatsApp in TV campaign nei

Messaging platform lian, WhatsApp chuan chanchin dik tawk lo thehdarh a nih ṭhin do letna atan Thawhṭanni khan a vawi khatna atan India ramah TV campaign a nei ṭan.

WhatsApp hian a hmain WhatsApp hmangtute zingah thu dik lo thehdarh lo tura inzirtirna turin radio campaign thawh hnihin a lo nei tawh a ni. Radio campaign thawh khatna hi August 29 khan neiin, Bihar, Jharkhand, Madhya Pradesh, Chhattisgarh, Rajasthan leh Uttar Pradesh-a All India Radio (AIR) radio station 46-ah ads a lo tichhuak tawh a ni. A thawh hnihna hi September 5 khan Assam, Tripura, West Bengal, Gujarat, Karnataka, Maharashtra, Andhra Pradesh and Telangana, Orissa leh Tamil Nadu-a AIR radio station 83-ah neih a ni bawk.

TV campaign neihna atan hian WhatsApp chuan filmmaker Shirsha Guha Thakurta a thawpui a, WhatsApp hmangtu thu dik tawk lo thehdarh a nih dante leh hei hian nghawng a neih theih dante lantira second 60 awh film pathum siam a ni.