Bulandshahr case : UP police-ten mi 87 lakah FIR ziaklut

Uttar Pradesh police-te chuan Bulandshahr-a tharum thawhna thleng kaihhnawihah mi 87 lakah FIR pahnih an ziaklut a, mi pali an man tawh bawk.

FIR pakhat hi bawng talhtu nia puh lakah ziahluh niin, a dang pakhat hi a hnua tharum thawhna thleng kaihhnawihah thehluh a ni. FIR pahnihah hian UP police-te chuan hming 27 an ziaklang a, hei bakah hian midang 60 inhnamhnawih tela tarlan a ni bawk.

Police-te FIR ziahluha mi 27 hming tarlan zinga pali chu right-wing organisation worker-te an ni a, an zingah hian Bajrang Dal member pawh an tel. Rinhlelh zingah Baijrang Dal district convenor Yogesh Raj pawh a tel a, mahse man a la ni ve lo.

Pathianni zan khan Uttar Pradesh khawthlang lam, Bulandshahr district-a Mahaw khaw bula ramhnuai, police post bulah bawng 25 ruang hmuh a ni a, hei vang hian Thawhṭanni khan tualchhung mipuite leh Hindu pawl hrang hrangte chuan lungawi lohna lantirin buaina nasa tak a chhuak zui a ni. Bawng talhtu nia puh pakhat chu mipuite thinrim hian an sawisa hlum a ni. Inspector Subodh Kumar Singh kaihhruaiin police-te chuan he thil thlenna hmun hi an pan a, mipui thinrim hian police-te hi lung leh hmanraw dangten an bei zui a, Inspector Singh chu mipuite kutthlakna avang hian a thi a, police dang panga-in hliam an tuar bawk. Mipui pungkhawmte hian police station bakah motor eng emaw zat an hal bawk a ni. Police-te chuan a hnuah Inspector Singh hi silaia kah vanga thi niin an sawi leh a ni.

Bulandshahr buaina thleng chungchang hi chhui chiang turin Special Investigation Team din nghal a ni a, Chief Minister Yogi Adityanath chuan nihnih chhunga report thehlut turin a ti a ni. CM chuan Singh-a ralna hi a nupui hnenah cheng nuai 40, a nu leh pa hnenah cheng nuai 10 pek an nih dawn bakah an chhungkaw member pakhat chu sorkar hna pek a tiam bawk.

State sorkar chuan he buaina thleng chungchang hi SIT chhui turin thupek a tichhuak tawh a, bei bakah hian additional director general (intelligence) leh magisterial probe pawh neih a nih dawn tih ADG (law and order) Anand Kumar chuan a sawi.