Telangana Congress hruaitu man

Telangana Congress Working President leh Kodangal MLA nilai Revanth Reddy chu nimin zing khan Kodangal-ah police-ten an man.

Telangana Chief Minister leh Telangana Rashtra Samiti (TRS) hotu K Chandrasekhar Rao chuan Kodangal-ah hian nimin khan rally neih a tum a, rally neihnaah boruak ṭha lo a thlen venthawn thilah police-te chuan Reddy hi an man a ni. Reddy hi KCR rally tihbuai tuma vauah puh a ni a, hei vang hian Election Commission pawhin Reddy hi hriattirna a lo pe tawh bawk.

Reddy hian kumin kumtir lam khan Telugu Desam Party (TDP) chhuahsanin Congress hi a zawm a ni.

Telangana Congress chuan Reddy man a nih chungchang hi an party twitter-ah tarlangin, CM KCR-an rally a huaihawt dawn vangin Working President & MLA Revanth Reddy chu zing dar 3-ah a man a, hei hi an dem hle tih an sawi. EC chu an state-a inthlan felfai leh thianghlim a awm theihna tura hma la tura an phut thu an tarlang bawk.

Assembly seat 119 awmna, Telangana assembly inthlan hi December 7 hian neih a ni dawn a ni.