CJI a puhna chungchang sawifiah turin Jutice Joseph phut

Supreme Court judge hlui, Justice Kurian Joseph-an Chief Justice of India (CJI) hlui Dipak Misra kaihhruaina hnuaiah Supreme Court chu an a kaldan a dik lo a, CJI hi pawn lam aṭanga thununtu an awm nia a sawi chungchang chu chiang zawka sawifiah turin solicitor general hlui Mohan Parasaran chuan a phut tih a sawi.

November 29-a pension, Justice Joseph hian Thawhṭanni khan CJI hlui Dipak Misra chungchang hi sawiin, pawn lam aṭanga thununtu an awm tlat avangin court kalphung thlengin a nghawng a ni, a ti.

Parasan chuan Dipak Misra hunlaiin Justice Joseph pawh chu Supreme Court judge a ni a, hei vang hian pawn lam miten hriatthiam a harsa an ti a, a thusawi finfiahna a pek a ngai tih a sawi. Justice Joseph chu a zah hle tih a sawi a, hemi chungchangah hian Chief Justice pawh chuan dik taka hma a lak ngei a beisei thu a sawi.

Congress party pawhin Justice Joseph-an CJI hlui chu pawn lam aṭanga thununtu an awm nia a sawi chungchang chu chhui chiang turin a phut. Congress party hian a hma pawhin CJI hlui Misra hnuaia judiciary system kalpui dan chu an lo sawisel fo tawh a, Rajya Sabha-ah pawh Mirsa banna tur motion hi an pulut a, mahse House chairman Venkaiah Naidu chuan eptute motion putluh hi a lo hnawlsak tawh a ni.

Congress party thupuangtu Abhishek Manu Singhvi chuan SC judge hlui ngeiin court rorelnaah pawn lama aṭanga thuneitu inrawlh an awm tih a sawi a, hemi chungchang hi Prime Minister leh central-a rorellai party hotute chuan an sawifiah a, tunge inrawlh a, eng thil nge an tih tihte an sawi a ngai a ni, a ti. Hei vang hian hemi chungchang hi chhuichian an phut thu a sawi.