Face mask thlahdul nan a la hma mah mah : Expert

Ram chhunga hri lengin ziaawm lam a pan zel avangin sorkar laipui chuan nimin aṭang khan Covid khuahkhirhna siamte chu tihtawp a ni tur thu a lo puang tawh a, mahse face mask leh social distancing norm erawh kalpui chhunzawm a la ni dawn tih a sawi.

Hetih lai hian state ṭhenkhat chuan Covid khuahkhirhna tihtawp rual hian face mask vuah pawh mipuite duh thlannaah a dah. Vuah ngei ngei tura tih tawh loin, Covid chauh ni lo hri leng dang lakah pawh invenna ṭha tak a nih avangin face mask vuah chu a ṭha tih an sawi a, mahse vuah duh lote pawh chawitir an ni tawh dawn lo thung.

Face mask dan thlahdul zingah Maharashtra, Telangana, West Bengal leh Dehli sorkar pawh an tel. Heng state-ah hian kum hnih chhung chu face mask vuah lo chu Rs 2,000 thlenga chawi theihna dante an lo siam tawh a ni.

Fortis Escorts Hospital, Faridabad-a Additional Director leh Pulmonology department head, Dr Ravi Shekhar Jha chuan face mask chu vuah ngei ngei tur a la nih thu leh, thlahdul mai nan chuan ala hma thu a sawi. "Hri leng thawh hnihna rapthlak tak khan khawvel pumah ṭhalai nunna tam tak a laksak a, khatiang thil rapthlak khan tunlai khawvela kan la hriat loh a ni. Hri leng thawh khatna a zawha mipui inthlahdul chhoh avangin khatianga taka chhiatna kha rawn thlen a ni maithei. India mi tam zawkin vaccine an la tawh ngei a, mahse vaccine hian hri kai theihna lakah min veng pumhlum lo tih kan hriatreng a ngai. Kan thihpui lo a nih pawhin, hri kai chuan thla tam tak chhung kan taksa nghawngin, kan chak loh phah a ni," a ti. Hei vang hian a theih anga Covid hri laka inven chhunzawm reng a, invenna atana ṭangkai tih finfiah tawh mask chu vuah chhunzawm reng a la ṭul thu a sawi.

Paras Hospitals, Gurugram-a Pulmonology department-a HoD-a Dr Arunesh Kumar pawhin vaccine lak bakah mask vuah chu Covid hri laka invenna ṭangkai ber a ni tih sawiin, India ram ang mipui tamna ramah mask vuah ṭhat loh a nih chuan, nghawng ṭha lo tak a thleng leh a hlauh thawnawm thu a sawi bawk. Mask chuan tuberculosis leh allergy lama harsatna awm ṭhin laka invenna atan pawh a ṭangkai hle a ni, a ti. Hei vang hian mipuite pawh pawn an chhuahna an duhthu ngeia mask chu vuah a, Covid hri do let hna hlawhtling taka kalpui a nih theihna tura pui turin a sawm.