India-in thil a lei duh phawt chuan sawiho kan inpeih reng - Russia FM

India ram tlawha rawn zin, Russia foreign minister Sergey Lavrov chuan India foreign policy chu fakin, India-in Russia aṭanga thil engpawh a lei duh a nih chuan sawiho turin an inpeih reng tih a sawi.

Lavrov hian nimina foreign minister S Jaishankar nena meeting an neih zawhah chanchinbu mite a kawmnaah he thu hi a sawi a, "India rama thil supply turin kan inhuam reng a ni," a ti.

India leh Russia hi hun rei tawh tak aṭanga ram inṭhianṭha tak niin, tun hnaia Russia-in Ukraine a run chungchangah Russia demna resolution siamahte pawh India hian vote a thlak ve ngai lo a, Russia demna thuchhuah a la tichhuak lo. 

Russia hian man tlawm zawkin India hnenah oil tam tham tak leitir a tum nia sawi thawm pawh a awm mek a, ram pahnihte hian khawthlang ram pawisa hmang lo a, insumdawnna atana ruble-rupee hmanna tur inremna pawh siam an tum nia sawi a ni.