Punjab Assembly-in Punjab hnena Chandigarh hlanna tur resolution pass

Punjab Legislative Assembly chuan nimin khan Punjab kuta Chandigarh hlanna tur resolution chu lungrual takin an pass.

Punjab leh Haryana state-te joint capital, Chandigarh hi city, district leh union territory a ni a, Chandigarh inrelbawlna hi Punjab leh Haryana-a officer ten 60:40 ratio-in an enkawl ṭhin. Mahse tun hnaiah sorkar laipui chuan inrawlhin, pawn lam ami officer-te chu Chandigarh-ah hian dahin, Chandigarh Administration-a hnathawkte tan Central Civil Service Rules a hman tir bawk a, hei hi tun hma lama an tihdan ngai lo a ni. Union home minister Amit Shah chuan kar liam ta khan Chandigarh-ah hian Punjab service rules ni loin, central service rules hman a nih tur thu hi a puang a ni.

Chandigarh chung­changa sorkar laipui inrawlh tumna hi duh loin, Punjab kuta hlanna tur resolution hi nimin khan chief minister Bhagwant Mann chuan House-ah a pu lut a, voice vote hmangin member-ten lungrual takin an pass a ni. Vote laknaah hian BJP member-te erawh an tel ve lo. AAP member bakah, Congress, Shriromani Akali Dal leh Bahujan Samaj Party member-ten an thlawp a ni.

CM Mann chuan Chandigarh chu Punjab state khawpuia siam a ni a, tun hma lam pawhin state ṭhendarh a nih dan chuan a khawpui chu a state hringtu zawk kuta dah a ni ṭhin. Hei vang hian Punjab kuta Chandigarh hlan chu kan phut tlat a ni," a ti.