SC-in state palite Covid Report pe turin a ti 'Heng state-te dinhmun hi a hlauhthawnawm'

Supreme court chuan nimin khan Delhi, Gujarat, Maharashtra leh Assam state-te chu an state chhung Covid-19 hri darh dan chungchang report pe turin a ti a, "Heng state-te hi an hri leng darh zel tur dona tura an inbuatsaih ṭha viau a nih loh chuan December thlaah chuan an dinhmun hi a hlauhthawnawm tawh hle ang," a ti. 

Court chuan state paliah hian tun thla chhungin hri kai an pung nasa hle tih an hriat thu a sawi a, hei vang hian status report hnuhnung ber an hre duh tih a sawi a ni. An state-a  hri len mek dan chungchang te, hri kaite enkawl an nih dan leh, hri darh tur venna atana hma a lak dante a hre duh tih a sawi a ni. 

State palite dinhmun hi judge pathum, Justice Ashok Bhushan, R Subash Reddy leh MP Shah awmna bench chuan nimin khan a ngaihtuah a ni. 

Sorkar laipui chuan court  hnenah union home minister Amit Shah-a'n Delhi-a hri darh tur venna atana hma a lak dan a hrilh a, hemi chungchang hi Delhi sorkar chuan sawi tur tam tak a nei ang, a ti. Delhi-ah hian hri kai hmuh tawh hi nuai 5.29 an awm tawh. 

Delhi sorkar hian khawpui pumah lockdown puang kher loin, hri darh tur venna tan khuahkhirhna khauh zawk a siam a, pawn chhuahnaa hmai tuamna hmang lote sum chawitir pawh Rs 500 aṭangin Rs 2,000-ah a tipung tawh a ni. Hei bakah hian social distancing dan chu khauh taka kengkawh turin thuneitute hriattir an ni bawk. 

Pathianni khan Delhi sorkar chuan Punjabi Basti market leh Janta market-te chu hmaituamna hmang lo an tam vang leh, social distancing dan zawm ṭhat loh vangin November 30 thleng khar turin thupek a tichhuak a, mahse nimin khan thupek hi a sut leh nghal a ni. 

Court chuan Gujarat sorkar chu sawiselin, an dinhmun a ṭha lo hle a, sorkar chuan eng angin nge hma a lak tih a zawt a, hri leng hi an thunun vat loh chuan Delhi dinhmun angah an din mai theih tur thu a hrilh. Gujarat-ah hian hri kai an pun chak avangin state sorkar chuan khawpui lian, Ahmedabad, Rajkot, Surat leh Vadodara-ahte zan lamah curfew a puang a ni. 

Maharashtra chu state zingah Covid-19 kai  hmuh chhuah tamna ber a la ni chhunzawm zel a, Pathianni khan an state-ah hri kai hmuh thar mi 5,753 awmin, hri kai hmuh chhuah tawh hi nuai 17.8 an awm tawh.