Petrol leh diesel man tisang leh

Petrol leh diesel man chu nimin khan March 22 hnua a ṭum 11-na atan pawisa 8-ah tihsan a ni leh a, kar hnih pawh tling lo chhungin fuel man hi Rs 8-in tihpun a ni tawh.

Ram pumah petrol leh diesel man hi tihsan a ni a, mahse state-ten local tax an lak azirin a man erawh a danglam a ni.

Delhi-ah chuan nimin khan petrol litre khat Rs 103.41 leh diesel litre khat Rs 102.61-ah a kai a, Mumbai-ah chuan petrol litre khat Rs 118.41 leh diesel litre khat Rs 102.64 a ni bawk.

Delhi Congress-in lungawi lohna lantir
Delhi Congress unit chuan ram chhunga oil man tihsan belh zel a nih vangin nimin khan BJP kaihhruai sorkar laipui laka lungawi lohna an lantir.

Congress party-in "Mahangai Mukt Bharat" campaign a kalpui mekna hnuaiah nawrh hi huaihawt a ni a, Delhi Pradesh Congress Committee (DPCC) president Chaudhary Anil Kumar-a'n a kaihruai a ni. Nawrh huaihawtte hian oil leh natural gas man pung zelah BJPsorkar chu mawhphurtua puhin an lungawi loh thute an aupui a ni.

Kumar chuan state panga assembly inthlan zawh fel a nih hnuah BJP sorkar chuan petrol, diesel, CNG, PNG leh domestic gas cylinder man a tisang chho zel tih sawiin, hei hi nitin khawsakna atana mamawh man thlengin a nghawng tawh a ni tiin, fuel man tihsanna chu sut leh turin sorkar an phut thu a sawi.