Haryana-in Assembly special session ko

Punjab Assembly-in Punjab leh Haryana joint capital, Chandigarh chu Punjab kuta hlan phutna resolution a pass hnuah, Haryana sorkar chuan April 5-ah assembly special session a ko ve leh nghal.

Haryana transport minister Mool Chand Sharma chuan council of ministers meeting neihah he thutlukna hi an siam thu sawiin, Punjab resolution bakah thil dang pawh ngaihtuah a ni dawn tih a sawi.

Chief minister Manohar Lal Khattar chuan Punjab chief minister Bhagwant Mann kaihhruai Aam Aadmi Party (AAP) sorkarin an state kuta Chandigarh hlanna tur resolution an siam chu a dem thu a sawi bawk. CM Mann bakah AAP convener ARvind Kejriwal-te chu Haryana mipuite hnenah ngaihdam dil turin a phut tih a sawi. "An thiltih hi a demawm takzet a, hetiang hian an ti tur a ni lo," tiin Chandigarh chu Haryana leh Punjab khawpui inṭawm a ni reng dawn tih a sawi bawk.

Haryana assembly-a leader of opposition, Bhupinder Singh Hooda pawhin Punjab sorkar chuan state pahnihte inkara inremna ṭha tak awm chu a rawn tichhia nia sawiin, Chandigarh chu Haryana khawpui a ni ve zel dawn a ni, a ti.