Security force-ten J&K-ah firfiak 4 man

Jammu and Kashmir-a Bandipora-a Ashtango area-ah security force-ten Lashkar-e-Toiba hmun pahnih dap chhuakin, an pawl nena inzawmna nei firfiak pathum an man tih an sawi. Rakh Hajin-ah firfiak pakhat man a ni bawk.

Security force-te hian an thu dawn bawhzuiin, Bandipora-a Ashtango area-ah LeT thawhpui mi pathum - Irfan Ahmad Bhat, Sajad Ahmad Mir leh Irfan Ahmad Jan an man tih an sawi a, heng mite hi LeT firfiakte chetvelna tura chanchin hrilh ṭhin leh an mamawhte lo ngaihtuahsak ṭhintu an ni tih an sawi.

Rakh Hajin-ah security force-ten mi pakhat, Irfan Aziz Bhat an man bawk. A kut aṭang hian Chinese grenade an man tel a ni. Aziz Bhat hi Pakistan-a firfiak, Umar Lala nen pawh inbe pawh ṭhin a puh a ni a, Hajin area-a firfiakte pawikhawihna thlenna tur pawh ruahman mekah puh a ni.

An mi mante hi Bandipora leh Hajin police station-ah hruaiin thubuai siamsak nghal an ni a, thu zawhfiah mek an ni.