Foreign secretary Nepal-ah zin dawn

Foreign secretary Harsh Vardhan Shringla chu November 26-27 chhungin Nepal-ah a zin dawn tih ministry of external affairs (MEA) chuan a tarlang.

Secretary zin tur chungchang hi India leh Nepal-in tun hnaia ramria intihbuaina an neih chungchang  a sawipui dawn niin media-te chuan an tarlang. Hei bakah hian Covid-19 chungchangah ram pahnihte thawh dun dan tur  chu a zin chhung hian an sawi dawn nia tarlan a ni bawk. 

Nepal prime minister KP Sharma Oli kaihhruai cabinet-in political map thar a pawmah chuan India nena an inrina, ram pahnihten an inchuh mek Lipulekh, Kalapani leh Limpiyadhura ramte chu Nepal ram chinah rin luh a ni. Hei vang hian India leh Nepal hi tun hnaiah ramri chungchangah buaina an neih phah a ni. 

Lipulekh pass hi India chuan Uttarakhand-a Pithoragarh district chhunga mi niin a chhal a, Nepal hian an rama Dharchula district huam niin a sawi thung. 

Map tharah hian ramri ram km 335 huam chu Nepal-ah rin luh a ni. Nikum October thlaa India-in political map thar a siamah Lakapani leh Lipukethte chu a ram chinah a lo dah tawh bawk a, hei vang hian ram pahnihte hi an intihthiam loh phah a ni.