Kar 2 chhunga a ṭum 12-na atan fuel man tisang leh

Petrol leh diesel man chu nimin khan litre khat pawisa 40 ve vea tihsan ani leh a, hei hi kar hnih chhunga fuel man tihsan a nih ṭum 12-na a ni. Kar hnih chhunga petrol leh fuel man tihsanna hi litre khatah Rs 8.40 a tling tawh.

Nimin khan Delhi-ah petrol litre khat Rs 103.81 leh diesel litre khat Rs 95.07 ah a kai tawh a ni. Ram chhunga khawpui lianah nimin khan petrol man hi litre khat Rs 100 a kai vek a ni.

Fuel man tihsan duh loin eptute LS aṭangin chhuak
Nimina Lok Sabha rorel inkhawmah, eptu party - Congress, Trinamool Congress, DMK, Shiv Sena, National Congress Party leh Left party member-te chu ram chhunga fuel man tihsan belh zel a nih avanga lungawi loin, House aṭangin an chhuak.

Lok Sabha-a Zero Hour hman ṭan a nih veleh, DMK member-te chu House laiah chhuak khawmin, fuel man tihsan an duh loh thu an aupui nghal a ni. A hnuah eptu party member-te pawh an rawn kalchhuak ve leh bawk. Hemi hnu hian inkhawm kaihruaitu, Rajendra Agrawal chuan Zero Hour hi a kalpui chhunzawm zel a, eptu party-te hi lungawi loin House aṭang hian an chhuak ta a ni.

Rajya Sabha rorel inkhawmah pawh eptuten petrol leh diesel bakah nitin khawsakna atana mamawh man tihsan duh lohna lantira an aubuai avangin chawhnu dar 2 thleng inkhawm tihtawp a ni.

Fuel man sang duh lohna lantir turin Irani phût
Shiv Sena youth wing, Yuva Sena chuan nimin khan Nagpur-ah fuel, LPG leh essential commidities man tih san duh lohna an lantir.

Nagpur-a Gandhi Gate Mahal-a Shivaji lim bulah ‘thali bajaao agitation’ hi huaihawtin, Yuva Sena president Vikram Rathore chuan BJP hruaitu leh union minister, Smriti Irani chu kum 2014-a fuel man tihsan duh lohna a lo lantir tawh ang khan, tun ṭumah pawh lungawi lohna lantir leh turin an phut tih a sawi.