Ni 715 hnuah a ṭum khatna atan hri kai thar 1,000 tling tawh lo

India ramah Covid-19 hri leng a ziaawm tawh hle a, Pathianni khan ram pumah hri kai hmuh chhuah thar 913 awmi, ni 715 hnuah hri kai thar 1,000 an tlin loh ṭum khatna a ni.

Hri kai mek, active case pawh ni 714 chhunga a hniam ber ni niin, Pathianni khan mi 12,597 an awm. Hemi ni vek hian hri vanga thi mi 13 awmin an zinga pariat hi Kerala state ami an ni. Nimin zing dar 8 thleng khan India ramah Covid-19 vanga thi hi mi 5,21,358 an awm tawh. Hri vanga thi zinga mi 1,47,789 chu Maharashtra state ami niin, Kerala-ah mi 68,074, Karnataka-ah 40,054, Tamil Nadu-ah 38,025, Delhi-ah 26,153, Uttar Pradesh-ah 23,496 leh West Bengal-a mi 21,199 chu hripui vang hian an thi tawh a ni.

Hri kai hmuh chhuah tawh aṭangin hri kai mek hi 0.03% a ni mek a, hetihlai hian hri kai enkawl dam, recovery rate chu 98.7% a ni tawh thung.

India ramah nimin hma lama ni khata hri kai thar mi 1,000 hnuai lam an nih hnuhnun ber chu April 18, 2020 kha niin, hemi ni hian hri kai thar mi 991 an awm.