AP CM-in district thar 13 hawng

Andhra Pradesh chief minister YS Jagan Mohan Reddy chuan nimin khan district thar 13 a hawng.

District siam tharte hi district awmsa 13 aṭanga siam niin, state-in district a neih zat hi a leta pungin, 26 an awm dawn ta a ni. Sorkar chuan thuneihna semrual leh hmasawnna rualkhai zawka kalpui a nih theihna turin district-te hi ṭhendarh a ni tih a lo sawi tawh a ni.

CM Reddy chuan virtual-in district tharte hi a hawng a, he hun hi MP, MLA, district collector leh superintendent of police-ten an hmanpui a ni. CM chuan an state-in district a neih zat chu a leta a pun tak avangin bul an ṭan thar dawn tih sawiin, a kaihhruai sorkar chuan state khawpui aṭanga thingtlang khaw kilkhawr ber thlengin hmasawnna rualkhai takin a kalpui dawn a ni, a ti. District tharte hi mipuite duhdan zulzuia siam a nih thu leh, district hming pawh uluk taka ngaihtuah hnuah phuah a nih thu a sawi.