Sorkar laipuiin 'agriculture export policy' a pawm

Prime Minister Narendra Modi-a kaihhruaia Ningani-a Union Cabinet meeting chuan kum thum chhunga loneituten an thlai thar chhuah aṭanga sum tam zawk an lakluh theihna tura duan, National Agriculture Export Policy chu a pawm.

Cabinet meeing-ah hian he policy kalpuina kawnga lo enpuitu tur, 'monitoring framework' din rawtna pawh pawm nghal a ni bawk.

National Agriculture Export Policy hi loneitute thlai tharchhuahte ram pawn lama tam zawka thawnchhuah theihna tur niin, he policy hmang hian India chuan agriculture lamah global power a siam a, loneitute sum lakluh a let zeta tihpun tum a ni. Tuna India-in agricultural export dollar tluklehdingawn 30 chu kum 2020-ah dollar tluklehdingawn 60 a tihpun a tum a ni.

Union Transport Minister Suresh Prabhu chuan he policy siam a nihna chhan chu loneituten an thlai thar chhuahte ram pawn lama thawnchhuahna remchang ṭha zawk an neih a, an sum hmuhte a lo puh theihna tur a ni, a ti.

Sorkar chuan he policy chungchang hi kimchangin a la puangzar lo a, mahse infrastructure ṭha zawk siamna tur pawh a huam tel nia sawi a ni. Hei bakah hian thlai thawnchhuahnaa khuahkhirhna a siam ṭhin pawh tawptir tum a ni bawk. Sorkarin ram pawn lama thlai thawnchhuahnaa khapna leh khuahkhirhna a siam ṭhin hian loneitute a ti thinur thei hle a ni.

Tun hnaiah ramchhunga loneitu hrang hrangte chuan an thlai thar man ṭha zawka bithliah sak phutin lungawi lohna an lo lantir fo tawh a, Delhi leh Mumbai-ahte kawng zawh runpui an lo nei tawh bawk.