India mi hausate hman ṭhin golden visa titawp dawn

United Kingdom (UK) sorkar chuan India mi hausa zualten an rama awm theihna atana an hman ber ṭhin, Tier 1 Investor visa, 'golden visa' tia sawi ṭhin chu hmansual pual venthawn thilah a titawp dawn tih a sawi.

Golden visa hi UK-a investment ti duh, mi hausa tawntaw te tan UK-a awmngheh theihna tur rang taka an neih theihna a ni a, mahse dan siamṭhat a nih hma chuan nizan zanlai aṭang khan tihtawp a ni ta rih a ni.

Official figure tarlan danin, kum 2009 aṭang khan Britain-ah hian Indian millionaire 76 chuan golden visa hmang hian UK-a awm ngheh theihna an hmu a, kum 2013 kha golden visa diltu hi mi 16 awmin nikum khan pasarih an awm bawk. He visa hmang hian nikum khan Chinese leh Russian millionaire 1,000 chuang zet chu UK-a awm phalna pek an ni bawk a ni.

He scheme tihtawp tak hnuaiah hian UK-a pound maktaduai hnih investment tihin golden visa hi neih theih a ni a, kum nga hnuah indefinite leave to remain (ILR) pek an ni. Investment pound maktaduai nga chin tihin ILR hun hi kum thumah tihhniam a ni a, pound maktaduai 10 chin invest tur chu kum hnih chhungin amah leh a chhungte chu awmngheh phalna pek theih an ni bawk.