Vijay Mallya'n 'fugive' tag paih turin ngen

Bank hrang hranga loan leiba tam tham tak nei, London-a awm mek Vijay Mallya chuan Enforcement Directorate (ED) in thilsual tih vanga tlanchhia, 'fugitive' tia a an sawina chu paih turin Supreme Court-ah a ngen.

Nimin khan Supreme Court chuan Mallya ngenna hi ngaihtuahin, ED hnenah hemi chungchanga a chhanna hi pe turin a hrilh.

September thla khan Mallya hian Prevention of Money Laundering Act (PMLA) court hnenah he Act-in fugitive economic offender” (FEO) a tih chu a ni lo tih sawiin, sum tihchingpennaah a inrawlh lo tih a sawi tawh a ni.

Mallya hian kar tir lam khan Karnataka High Court-a a leibatna te nen inremna siam tura rawtna a lo siam tawh chu pawm turin alo ngen tawh bawk a ni. Mallya hi London-a man niin bail-a chhuah mek a ni a, sorkar laipuiin a thubuaite hmachhawn tura India rama thawn tura a ngenna chu kar leh hian Westminster Magistrate Court chuan ngaihtuahin thutlukna a siam ang.

Vijay Mallya chuan bank hrang hrangte chu a rawtna siam pawm turin a ngen a, an bak aṭanga loan tam tham tak a lakte chu jet fuel man san chhoh lai tak pawha Kingfisher Airlines a kalpui theihna ṭhin a ni tih a sawi. A zu company, United Breweries pawhin sorkarah chhiah tam tak a chhunglut tih a sawi bawk.

Kumin June 22 khan ED chuan PMLA court-ah hian Mallya chu fugitive economic offender (FEO) tia puang tur leh, a thil neih cheng vaibelchhe 12,500 hu pawh hreksak turin a lo ngen tawh a ni. June 30 khan PMLA court chuan agency ngenna hi a pawmsak a ni.