Fuel man sang chungchang vangin LS inkhawm ṭum 2 titawp ; Pawisa 80-in petrol leh diesel man tihpun belh leh

Eptu party member-ten nimina Lok Sabha rorel inkhawmah ram chhunga fuel man sang avanga lungawi lohna lantira an aubuai avangin, rorel inkhawm hi ṭum hnih tihtawp a ni.

Chawhma dar 11-ah House inkhawm ṭan a ni veleh, Congress leader Adhir Ranjan Chowdhury leh DMK hruaitu Baalu-te chuan kar hnih chhunga fuel man ṭum 13 zet tihsan a nih chungchang sawiho an phut nghal a ni. Mahse House speaker Om Birla chuan Question Hour a kalpui chhunzawm lui a, hei vang hian eptu party - Congress, DMK, Trinamool Congress leh Left party member-te chu House laiah kalchhuakin, prime minister Narendra Modi kaihhruai sorkar an demna thute an aupui a ni, Shiv Sena leh NCP member-ten an lo zawm ve bawk.A hnuah TRS member-te chu placard nen, Telangana state-a loneitute harsatna chungchang aupuiin an tel ve leh a ni.

Eptu member-ten lungawi lohna an lantir chhunzawm zel avangin, Speaker chuan chhun dar 12 thleng atan inkhawm a titawp ta a ni.

Chhuna inkhawm an ṭan leh hnuah pawh a ngai ang bawkin eptu member-te hian fuel man sang vanga lungawi lohna an lantir chhunzawm leh nghal a, Zero Hour hman dawnah eptu member-te hi House laiah kalkhawmin, sorkar laipui chu fuel man a tihsanna sut leh nghal tura phutin an auzui leh a ni. Zero Hour kaihruaitu, BJP member Rajendra Agarwal chuan chawhnu dar 2 thleng atan inkhawm a titawp zui leh nghal bawk.

Nimin khan India ramah petrol leh diesel man chu litre khatah pawisa 80-a tihsan belh leh a ni a, hei hi kar hnih chhunga a man tihsan a nih ṭum 13-na a ni tawh. Kar hnih chhunga fuel man punna hi litre khatah Rs 9.20 a tling tawh a ni.