Covid-19 vanga thi sing hnih tling tawh

Ministry of Health and Family Welfare-in nimina report a tihchhuahah darkar 24 chhungin mi 467 lai Covid-19 vangin an thi leh a, India ramah hripui len ṭantirh aṭanga nimin thleng khan hripui vangin mi 20,160 an thi tawh.

Nimina report tihchhuahah darkar 24 chhungin hri kai hmuh chhuah thar mi 22,252 an awm leh a, ni eng emaw zat chhung chu ni khata hri kai hmuh chhuah thar zat hian sing hnih a chuang ta a, heti hian ram pumah hri kai mi 7,19,665 an awm tawh a ni.

Nimin piah report-ah khan India ramah hian hri kai nuai sarih an la awm tling lo a, nimin hi hri len ṭantirh aṭanga India rama hri kai nuai sarih chuang an awm tlin vawi khatna a ni. Enkawl dam lamah pawh hmasawnna a awm ve zel a, darkar 24 chhungin mi 15,515 chu an dam leh tawh tih report  a ni a, mi 4,39,948 lai chu enkawl dam an ni tawh a, mi 2,59,557-in an la kai mek bawk. Enkawl dam tawh rate hi 61.13% a ni ve ta a, ni telin enkawl dam rate pawh hi a sang chho ve zel bawk.

Sample vbc chuang test 

Indian Council of Medical Research (ICMR) chuan darkar 24 chhungin Covid-19 sample 2,41,430 lai an test tih an tarlang a, hri len ṭantirh aṭanga nimin thleng khan sample 1,21,10,092 an test tawh a ni. ICMR hian ram puamah sample test-na atan laboratory pawmpui 1,115 a nei tawh a,  heng zinga 793 hi sorkar laboratory a nih laiin 322 chu private laboratory a ni thung.

India rama hri kai tam berna state Maharashtra-ah chuan nimin khan hri kai hmuhchhuah thar 5,368 an awm leh a, Covid-19 kai 2,11,987 an awm tling tawh a ni. Hri kai zinga 1,15,262 lai chu enkawl dam ni tawhin 87,699 chuan an la kai mek a, 9,026-in an thihpui tawh.

Tamil Nadu-ah pawh hri kai hmuh chhuah thar 3,827 an awm leh a, mi 1,14,978 laiin hri an kai tawh a ni. Mi 66,571-in an dampui tawh laiin 46,836 chuan an la kai a, 1,571-in an thihpui tawh bawk a ni. Delhi-ah pawh hri kai nuai chuang an awm tawh a, nimina report tihchhuahah chuan hri kai hmuh chhuah thar 1,379 awm lehin Delhi-ah hian mi 1,00,823 laiin hri an kai tawh. Mahse Delhi-ah hian enkawl dam an tam tawh hle a, 72,088 lai chu enkawl dam tawhin 25,620 chuan an la kai mek a, mi 3,115 lai chu hripui vangin an thi tawh a, dakar 24 chhungin 48-in an thihpui leh a ni. 

Maharashtra-a rorellai, Shiv Sena chuan prime minister Narendra Modi kaihhruai sorkar laipui chu hri leng a do danah na taka sawilsein, ram chhunga hri leng darh chak lutuk chu veng zo loah a puh. PM Modi-a'n March thlaa lockdown hmasa ber a puan ṭuma, Covid-19 leng mek chu ni 21 chhungin hneh a ni dawn tia a sawi chungchang chu sawi chhuakin, Shiv Sena chuan tunah ni 100 a chuang tawh a, hri vanga buaina chu a la zual zel thung tih an sawi. 

Khawvelah  hri kai tamna ram pathumnaah India a awm ta chu thil ngaihtuah zui ngai tak a nih thu sawiin, "Financial superpower nih tum mek ramah darkar 24 chhung hri kai thar mi 25,000 chuangte an awm ta  hi a vanduaithlak hle a ni," tiin Uddhav Thackeray-a party chuan an party chanchinbuah an tarlang.