Delhi-a sa dawr hawn khapna TMC MP Moitra-i'n a sawisel

South Delhi Municipal Corporation leh East Delhi Municipal Corporation-in Hindu festival Navratri hun laiin an bial huam chhunga sa dawrte inkhar vek tura a tih chu Trinamool Congress (TMC) MP Mahua Moitra chuan a sawisel.

Moitra chuan, "South Delhi-ah ka cheng a, kan ram danpui chuan ka duh hunah sa ka ei min phalsak a, dawrkaite pawhin an sumdawnna kalpui turin zalenna a pe a ni," tiin a twitter-ah a ziak.

Dawr kharna thupek hi official-a tihchhuah awm lo mah se, East leh South Delhi mayor-te chuan Navratri festival hman chhung, ni kua chhung chu an bial chhunga sa dawrte chu inkhar turin an ti a, he festival chhung hian mi tam zawkin sa an nei tih an sawi. Hei vang hian sa dawr neitute pawh official-ten an laka action an lak hlauh vangin an inhawng ngam lo a ni. Navratri festival April 2-11 inkarah hman a ni ṭhin. Tun hmain civic body hian he festival chhung hian sa dawrte inkhar turin an la ti ngai lo.

National Conference leader Omar Abdullah pawhin he thil hi sawiselin, "Ramzan laiin zing ni chhuah leh a tlak inkarah thil kan ei ngai lo. Hemi hun lai hian Muslim tamna bialah Muslim ni lo pawh pawn lamah thil ei khapsak ve vek ila, chutiang ang vel chu a ni. South Delhi-a a cheng tam zawkte awmdan anga engkim tih a nih chuan, Jammu and Kashmir tan pawh tih ve theih a ni," a ti.